a trash-bag of thoughts and things that swim in the mind of a wandering fool-for-Christ, a.k.a. taong-grasa-para-kay-Kristo wannabe... "If indeed aspiring to be free and happy and deliberately poor, simple, unfit for career advancement, and just a mere human being who is fully aware of his being so is really a case for the asylum, then please count me in! This is what being a fool-for-Christ truly means! I would willingly forgo a leg and an arm to even get anywhere near being one!"
Friday, March 12, 2010
SABADO DE GLORIA
‘Sing lamig ng pusod ng kwebang madilim
Ang umagang tumambad sa puyat na himlayan
Pati na mga kwago at bayakang maitim
Tila kulang sa idlip, nabulabog ng lagim
Ang maalat na luha’y ‘di tuluyang lumagpak
Sa halip naglambitin sa mga daho’t sanga
Pigil din ang paghuni ng kilyawan at maya
Nabahiran ng uling ang puti ng tagak
Bingi pa ang tainga sa bugbog ng kahapon
Sa nagsalong hinagpis at insultong malutong
Ng masiba at lulong na balanang hayok
At matalas na koronang sa bumbunan pinutong
Napuknat ng mainam ang telon ng trahedya
Nilugami’t binulid ang hungkag na dangal
Tumambad pagkapunit makinang na salamin
Nagbunyag sa larawan ng agnas na pithaya
At wala na sa hiram na puntod ang poon
Ni sa yungib, o dagat, o bundok na matayog
Ni sa kahoy, o bakal, o telang balumbon
Hayun na at ang araw ang liwanag nagsabog!
Subscribe to:
Post Comments (Atom)
No comments:
Post a Comment